الخطة

1- مشروع  الإصلاح الدستوري و التشريعي ، الميثاق الدستوري الوطني.

2- قانون محاسبة الرئيس.

3- مشروع برلمان الشباب.

4- مشروع قانون حرية الإعلام.

5- مشروع قانون الإنتخابات الجديد.
6- مشروع الإحلال و التجديد الإداري

7- مشروع تطهير القضاء و الشرطة و الجيش.

8- مشروع إستغلال أمن الدولة.

9- مشروع إصلاح المؤسسات العقابية.

اليوم الأول

هذا هو اليوم الأول لي كرئيس إفتراضي لجمهورية إفتراضية في حقبة إفتراضية لدولة إفتراضية سنسميها إفتراضاً "جمهورية فنطازية العربية" ، و من قبيل المصادفة أنها تقع في الركن الشمالي الشرقي من قارة "أفتيكيا" في كوكب "البطيخة" و الذي يقع في مجموعة شمسية تعرف باسم "درب المهاطيل"، و أنه يحدها شمالاً البحر المتشنكح، و شرقاً البحر الفوشيا و جنوباً دولة إسمها "الخضران" .. إلخ إلخ ، و أن طقسها حار جاف صيفاً دفئ ممطر شتاءً بينما يصر غالبية الشعب على إعتبار هذه الحقيقة العلمية خرافة يضحكون بها على الغلابة. و من هنا وجب التأكيد على أن أي تشابه بين ما يحدث في "فنطازية" هو من قبيل الصدفة البحتة ولا علاقة له بالواقع ... إطلاااااااااقاً.

أنا الآن على متن سيارة الرئاسة متجهاً إلى مقر الرئاسة -برضك- لأول مرة في حياتي .. تتنازعني الأفكار و الطموحات و الأعباء و المسئوليات، المعارضة و المنتفعون و كذابين الزفة .. يا نهار أزرق !! دا أنا بقيت رئيس بجد يا جدعان !!!!!!!!!!

تعمل كيف يا عبد الرحيم!! تعمل كيف يا عبد الرحيم !!

ألقيت نظرة على نسخة خطابي على الآيباد الرئاسي الخاص بي - أيوة عندنا في الكوكب بتاعنا آيباد، مندهشين ليه- و مسودة قراراتي الأولى التي لطالما كتبتها في مذكراتي على مر السنوات الماضية، شعرت بالوهن و الشيخوخة يتسللان إلى جسدي .. و تخاذلت أطرافي و أنا أتذكر أن كل يوم يمر و هناك جائع أو عريان في بلدي أتحمل وزره أمام الله يوم القيامة! حتى و إن كان هذا من تركة الرئيس السابق .. داهية تكحمه مطرح ما راح!

طبعاً أساسي لازم نبتديها شحاتة!! هو الله يــــــــ .... رحمه ساب فيها حاجة ؟!!

إنشاء مشروع صندوق "التكافل الشعبي"، و يكون من وظائفه تلقي تبرعات المواطنين في الداخل و الخارج و ينفق منه على تحسين مرافق الدولة و إقامة مشاريع طويلة الأمد لخدمة المواطنين، و مساعدة الحالات العاجلة و الطارئة التي لا تتوفر لها بنود خاصة في لوائح الوزارات المعنية لمساعدتها، إضافة إلى جمع الزكاة إجبارياً و إنفاقها في مصارفها الشرعية.

(أيوة إجبارياً !! زعلان ليه حضرتك ؟؟ عارف و الله إنها عبادة دينية .. إنما ما تقوليش ما ينفعش نجبر الناس عليها ... إشمعنى بتجبرهم على الضرائب و ضميرك مرتاح ؟ جت على الإتنين و نص ف المية دول ؟؟؟؟؟؟ و لا اللي ييجي من ناحية الدين يبقى كخة ؟؟)

ألقيتها بحسم في وجه مستشاري الليبرالي (ما هو أنا فضلة خيركم عندي مستشارين بقى .. واحد ليبرالي و واحد سلفي، آه و الله .. طول النهار نازلين ضرب ف بعض) فخنس تماماً .. بينما الآخر السلفي يرمقه بنظرة شماتة .. (ما تهمد انت كمان ؟!!) خنس هو الآخر .. عاجباني خنس دي .. بحب استخدمها كتير .. خايف يجي اليوم اللي أقول فيه لجلج!

بعد كده بقى اللي هيروح يعمل إعلان تهنئة أو تعزية لحد من المسئولين الكبار في الدولة هيكتشف إنه ممنوع ، و هيدفع برضه قيمة الإعلان، اللي هتتحط برضه في الصندوق ... هعههعهعهع .. و ديني لاخرب بيوتكوا يا بتوع الفساد!

هييجي واحد يقوللي طب ما هو هيعرف فمش هيدفع ... أقوله: لا يا ابو لسان طويل !!! احنا هندفعه الأول و بعدين نعرفه ... و مرة ف مرة الخبر هينتشر و محدش هيروح يعلن .

تاني قرار على طول ، خبط لزق ... إنشاء الهيئة العليا لحقوق الإنسان ، و دي هتكون هيئة مستقلة أعضائها كل منظمات حقوق الإنسان العاملة في البلد ، و اللي ملهاش فروع برة و ما بتاخدش تمويل من حد، كل جمعية أو مؤسسة حقوقية هيكون ليها نسبة مشاركة، و هما اللي بينتخبوا أعضاء المجلس الأعلى للهيئة بنفسهم، و وظيفة الهيئة دي إنها تراقب رسمياً أوضاع حقوق الإنسان في البلد، و هيكون ليها مندوبين في كل قسم شرطة و سجن و مقر أمني، و ليهم حقوق و سلطات واسعة، من ضمنها عدم إجراء أي استجواب أو تحقيق إلا في حضور مندوب عن الهيئة، و من حقهم تفتيش أي جزء من المقرات اللي بيشرفوا عليها، و الخروج مع الدوريات و مراقبة الأكمنة الثابتة. و لها صلاحية التحقيق بشكل مستقل و إصدار تقارير ترفع مباشرة إلى رئاسة الجمهورية.

نخش بقى على حبايبنا المستثمرين .. تعالوا لبابا ...

"تقليص مدد الإعفاءات الضريبية المقدمة لكبار المستثمرين إلى عامين فقط، و تمديدها لصغار المستثمرين و أصحاب المشاريع الصغيرة فقط إلى عشرة أعوام، اللي مش عايز يستثمر يغور في داهية ما يوجعش دماغي ... حيهربوا ؟؟ دا انت راجل طيب قوي .. دول بيكسبوا مليارات يا عمونا .. و مش محتاجين الإعفاءات دي أصلاً .... كده كده هما اللي محتاجين يستثمروا .. و أنا محتاج الضرايب .. مش هستفيد من استثماراتهم في حاجة إذا ما دفعوش ضرايب"

البطالة .. يا لهوي .. أنا نسيت البطالة !!

إنشاء الهيئة العليا للموارد البشرية، تحت إشرافي أنا شخصياً، و تكون بديلاً لوزارة القوى العاملة و الهجرة فيما بعد، و توكل إليها المهام التالية:
1- إعداد هيكل الأجور الموحد للدولة بأكلمها ، و يراعى فيه التوازن و العدالة و المرونة. يعني مش هيبقى فيه واحد بياخد مليون عشان مدير أو وزير و واحد بياخد ملاليم عشان خريج أول امبارح .. هنحاول نقرب المسائل شوية، و ده هيتطبق إجباري على القطاع العام و الخاص.
2- إعداد مشروع قانون الموارد البشرية ليعرض على البرلمان خلال شهرين من تاريخه، و يكون بديلاً لقانون العمل، و يعنى بشكل أساسي بتوفير أقصى درجات الحماية و الأمان الوظيفي للعامل، و في نفس الوقت إتاحة إمكانية الرقابة و المحاسبة من خلال تقييم عادل لأداء العاملين جميعاً بلا استثناء.
3- تشكيل لجان لتقييم جميع العاملين بالقطاع العام على أسس علمية، و تسريح العمالة كبيرة السن قليلة الكفاءة و المؤهلات، و إحلال جيل جديد من الشباب.
4- إعداد خطة قومية للتدريب و التأهيل الوظيفي بالتنسيق مع الجامعات.


حاجة كمان مهمة:  الإفراج عن جميع المعتقلين السياسيين و المقدمين لمحاكمات عسكرية .. زمانهم محبوسين من أيام المجلس العسكري يا ولداه!!!


نيجي بقى للتعديلات الدستورية، دي طبعاً لازم البرلمان يوافق عليها ... أنا راجل ديموؤراطي و بحب الديمؤراطية.

- إلغاء وزارة الإعلام، و إنشاء المجلس الأعلى للإعلام بدلاً منه، و تكون عضوية و رئاسة المجلس بالإنتخاب، و يكون حق الإنتخاب و الترشح لأعضاء نقابة الصحافيين التي سأقوم بتغييرها إلى نقابة الإعلاميين، و يصدر بذلك قانون مستقل.

- وزير العدل يتم إنتخابه من قبل أعضاء نادي القضاة لفترة زمنية ولا يشمله أي قرار بإقالة الوزارة أو سحب الثقة منها، و يظل حق إقالته أو سحب الثقة منه قاصراً على الجهات التي إنتخبته.

- وزير الثقافة يتم إنتخابه من قبل أعضاء الإتحادات و النقابات المعنية لفترة زمنية ولا يشمله أي قرار بإقالة الوزارة أو سحب الثقة منها، و يظل حق إقالته أو سحب الثقة منه قاصراً على الجهات التي إنتخبته.


- دمج وزارتي التعليم و التعليم العالي مجدداً ، مش هيصة وزارات هي !!!



إيه تاني .. .إيه تاني ؟؟؟ وصلنا ....اسمعوا الباقي على التلفزيون بقى !!!

البداية

قبل عدة أعوام إبتدرني أحد سائقي التاكسي بسؤال عن مؤهلي الدراسي، و عندما أجبته بأنه بكالوريوس التجارة إلتمع في عينيه بريق ذئب وجد فريسته بعد جوع و غمغم في جنون: 

- قشطة ! شوف يا هندزة .. بما إنك بتاع حسابات و كده أنا عايز أقولك "إكتراح" ، أي نعم أنا علامي على قدي برضه، لكن العلم في الراس ولا مؤاخذة مش في الكراس، و أنا برضك بتاع حسابات و معايا دبلون تجارة. 

إستبد بي الرعب و غصت في مقعدي متوجساً و أنا أتمتم: أنعم و أكرم .. 

- شوف يا هندزة .. مش إحنا كام و سبعين مليون أهو ؟ على قولك .. خليهم تمانين ... كام واحد فينا فجيبه جنيه مش فارق معاه حاجة في حياته ؟ كلنا .. إيه رأيك الشعب كله يعمل جمعية بجنيه واحد في الشهر ؟ تخيل بقى إنك تقبض تمانين مليون جنيه حتة واحدة كده و تقعد بقيت حياتك تدفع جنيه واحد بس كل شهر .. عليا الطلاق أنا مش أبيع التاكسي ! دا أنا أرميه في بحر شبين و آجي "أطرطر" عليه كل يوم الصبح، و الواحد بقى ياكل كل يوم كيلو لحمة لوحده، و يتجوز أربعة و العيال يدخلوا مدارس أمريكاني ....قبل أن ألفظ أنفاسي اضطررت لمقاطعته بعد أن إرتفع ضغطي إلى مستويات فلكية و أنا أحاول أن أبدو هادئاً :: أيوة يعني هي فكرة مش بطالة .. بس بالنسبة للي هيقبض الآخر إيه نظامه ؟ ، هرش صاحبنا صلعته و بدت عليه الحيرة و تلاشى الحلم المليوني فجأة و نظر إلي في حيرة طفل برئ ؟ - قصدك إيه عدم المؤاخذة ؟ 

أجبته و أنا أحاول جاهداً البقاء على قيد الحياة: "يعني لو حظك جه في آخر الجمعية هتقبضها بعد (حسبتها على الموبايل) ستة مليون و 666666 سنة تقريباً ... 

نظر إلي في إستخفاف و قال لي ؟ ماشي يا سيدي .. نخليها كل يوم .. و أهو الواحد يدفع 30 جنيه في الشهر "أزنه" رجع يشرب سجاير تاني .. (كان هذا في وقت كانت علبة كوكو الضعيف بجنيهين و نصف فقط) .. 

أردت التملص من حسبة برما قبل أن يسألني كم سنة سوف ينتظر آخر من في القائمة ، و قلت له: و بعدين يا اسطى لو كل واحد في البلد بقى معاه 80 مليون جنيه و ساب شغله زيك حتروح تشتري لحمة مش هتلاقي ، لأن الجزار برضه جاله 80 مليون زيك و مش عايز يشتغل ... و اللي هييجي على نفسه و يشتغل هيقولك كيلو اللحمة بـ 100 ألف جنيه إذا كان عاجبك (ده لو كان قنوع طبعاً) ، و زيه هيعمل بتاع الخضار و البقال و السباك .. و هتبص تلاقي ال80 مليون بتوعك ما يسووش 500 جنيه بسعر دلوقت. 

هبط الغم و النكد على دماغ صاحبنا فجأة و أصابه الإحباط لدرجة أنه كاد يقفز بالتاكسي و بي داخل بحر شبين قبل أن يهمس مهزوماً: تصدق صحيح !! برضه العلام حلو يا ولاد !! 

تصدق إنت قفلتني منك يا باشمهندس ؟؟ يلا انزل بقى علشان انا اتخنقت .

داخل كل مواطن مصري مشروع صغير لرئيس جمهورية (فاشل غالباً) ، فكل مصري لديه قدرة جهنمية على "الفتي" (الذي هو الإفتاء باللغة العربية الفصحى) ، و في عقل كل مواطن مصري حلول لوذعية لا تصل إليها عقول أكبر الخبراء و المحللين السياسيين و الإقتصاديين لمشاكل البلاد و العباد، لكنها تنتظر اللحظة المناسبة، و على كل مقهى و مصطبة و قعدة و صالون هناك حشد من الثرثارين الذين يطرحون دائماً حلولهم العبقرية الأسطورية على بعضهم البعض و يأسفون أن أحداً لا يلتفت إلى هذه الحلول مع أنها سهلة و ميسورة جداً.  

طوال عقود من حياتي أصادف الكثير من هؤلاء و كنت أحدهم في عدة مناسبات، و أنا أيضاً كانت لدي حلول و أفكار لوذعية خرافية كفيلة بحل مشاكل الكرة الأرضية في 100 يوم ، و لذلك قررت أنا العبد لله الفقير إلى مولاه إفتتاح مصطبة قطاع خاص للفتي الخاص بي ، و إشمعنى أنا يعني ؟ هي هتيجي عليا ؟ 

هذه المدونة ليست (كلها) من قبيل الهرتلة و التنفيس، و ليست مشروع دعاية إنتخابية لرئيس حقيقي، و إنما هي نوع من أحلام اليقظة لمواطن عادي لا يتمنى أبداً أن يكون رئيساً للجمهورية، و إنما يتمنى أن يكون له رئيس جمهورية يتبنى بعضاً من هذه الأحلام و يحولها إلى حقائق.

و مش بعيد تكبر في دماغي و أعملها، كلها 7 سنين و أوصل للسن القانوني قول 8 على ما يكون الرئيس الموجود وقتها خلص مدته بالسلامة

لذلك أرجوكم ثم أرجوكم ثم أرجوكم محدش يضغط عليا أرشح نفسي، لأني ممكن أتهور و أقول لكم 

لكم بس لو ما كنتوش تحلفوا !!!!

و ساعتها ممكن تندموا ، و أكيد أنا كمان هندم.

توكلنا على الله

إنتظرونا قريباً